立選獲2587票 詹培忠開支202萬

【明報專訊】立法會選舉參選人近日陸續申報選舉開支，只得2587票而落選港島嘅詹培忠，選舉開支原來都相當高，成個選舉工程用咗超過202萬元，即平均用780元先換到一票，而佢無申報任何選舉捐贈，即係所有開支都要自費。詹培忠喺選舉後期因為健康問題無再落區拉票，唔知佢覺得今次參選係咪物有所值呢？


佔詹培忠開支最多嘅，係用88萬元租咗4架選舉宣傳貨車一個月，佢喺網上宣傳、選舉網站同宣傳電郵等，亦使咗超過20萬元。今年唔少參選人都搵義工幫手喺選舉郵件貼地址，但正所謂有錢使得鬼推磨，詹培忠喺開支申報咗一項「選舉郵件貼標籤」，就已經用咗近19萬元。


何志光使22萬 陶君行公司墊支

另邊廂，以「狙擊」前議員黃毓民為主要政綱、落選九龍西嘅香港本土力量何志光，選舉開支接近22萬元，包括用7.5萬元喺一份報章落咗兩次狙擊廣告，同用咗近12萬元印咗14萬份宣傳小冊子。何志光嘅選舉開支由「香港網上電台有限公司」用現金全數墊底，Emily翻查公司註冊處資料，原來呢間公司係由同黃毓民素有積怨嘅社民連陶君行等人做主要股東。