李國章：政協應多向港人解釋國策 稱中央熟悉香港矛盾

【明報專訊】李國章擔任港大校委會主席，早前引起唔少風波，佢接受立法會前主席曾鈺成喺商台節目《鈺成千里目》訪問中，就承認當日特首梁振英（CY）搵佢做時，都曾建議對方另覓人選，但最終硬住頭皮接受邀請，又強調自己上任後並無整治港大嘅心態。


曾建議CY另覓校委主席

本身係全國政協委員嘅李國章喺節目度又提到，政協委員應該多下工夫，幫中央政府向港人解釋國內政策；政協委員也要向中央反映香港情况。佢話中央領導人對香港非常熟悉，「知道晒我哋嘅矛盾，知道晒我哋嘅拗撬各方面，掌握得非常之好」。


李國章認為，中央政府覺得現時中港溝通不足，認同愛國愛港人士應多啲參與，認為政協委員有責任向港人解釋內地情况，反問「但你話應唔應該整『第二爐』喺香港呢？再多多批評各方面呢？因為我哋有香港政府，我哋係要維護香港政府，係嘛？」至於人大、政協委員是否應多參與香港公共事務，李國章就認為人選要合適，「唔好睇係咪政協或人大」。