不吐不快 非為呃like 陳健波開fb專頁

【明報專訊】喺社交年代，facebook可以話係主要溝通渠道，保險界立法會議員陳健波噚日開咗facebook專頁，仲拍埋片講解自己點解玩fb。佢強調60幾歲人第一次玩fb，唔係為咗「呃like」，而係有啲嘢真係不吐不快。


波哥坦言，感覺到呢幾年，唔同年紀嘅人對香港前景都感到不安，覺得一方面同政府施政有關，另一方面亦因為社會接收信息不客觀、流於表面。佢就話，希望可以基於事實，分享多啲自己對時事嘅分析。但佢喺議會經常扮演「重炮手」，唔知上到虛擬世界後，睇到立場相左嘅網民留言，又會唔會忍得住手，定係會同網民激烈辯論呢？


波哥作為保險界議員，當然離不開老本行，佢透露有機會都會同大家講解吓「投保須知」。不過佢嘅專頁暫時只有不足100個人關注，可能要諗諗點樣吸引人關注喇。