出身工會世家 陸頌雄：受阿爸啟蒙

【明報專訊】立法會開鑼兩個禮拜，大家對一眾新丁表現評頭品足，其中工聯會陸頌雄表現最惹火。其實佢嘅強硬左派路線，未入議會前已有迹可尋，包括夠膽喺facebook公開批評時任立法會主席曾鈺成讚梁天琦係「腦入水」。進入立法會後，佢喺議員宣誓第一日已即場拍枱與青政梁頌恆隔空對罵，之後又拒絕喺《城市論壇》同梁頌恆同台。


Emily聽聞，原來陸頌雄係「紅二代」出身，阿爸係「六七動力研究社」副社長陸德成，當年六七運動入過獄，服務工會四五十年，根正苗紅。有知情人士向Emily透露，當年民建聯譚耀宗出選新界西，佢阿爸作為工聯會新西第一任地區主任，係背後操盤人。


後台咁硬，不過陸頌雄都依然要論資排輩，排隊等入立法會。但有人就笑言佢入嚟時機啱啱好，因為工聯會重炮手王國興失落議席，佢正好接班，兩人不用互搶風頭。


不過平日大家都少見陸家父子檔出現，陸頌雄就話無刻意避忌兩人關係，仲話自己宣誓嗰日都帶埋爸爸一齊觀禮。佢話，爸爸係影響自己服務工會、社區嘅人，兩人話題總離不開時事同足球。咁入到議會，阿爸有無過兩招？佢就話都係提點先要熟習基本功。