海上絲路展 一睹貿易文物

【明報專訊】「一帶一路」愈來愈近！繼有學術交流獎學金、坊間搞一帶一路旅行團，尖沙嘴香港歷史博物館都搞咗個「跨越海洋—中國海上絲綢之路．點．線．面」展覽，令到香港市民唔使跳出香港，都可以感受到「一帶一路」。


展覽今日正式開始，係2016年港澳與內地重點交流項目，香港政府同內地8個「海絲（海上絲路）城市」，包括寧波、蓬萊、北海、揚州、福州、泉州、漳州及廣州嘅相關單位合作，由佢哋借出170組文物，闡釋佢哋喺海上絲綢之路興起、發展所擔當嘅地位同功能；噚日嘅傳媒預展上，Emily就欣賞到揚州博物館嘅唐朝銅鏡藏品（圖），呢啲都係當年貿易嘅貨品。話時話，香港作為貿易港，亦同海上絲路有淵源，都有啲文物一齊展出。


展覽直至12月27日。除咗文物外，亦設有教育和趣味並重嘅互動節目，讓觀眾透過體驗，加深對海上絲路認識。