街工評分急升 列十大政團之首

【明報專訊】港大民研計劃噚日公布半年一度嘅十大政團評分，調查喺10月10日至13日以電話隨機訪問1004名市民，以100為滿分，街工評分較半年前急升9.2分，至54.3分，位居榜首；公民黨同民主黨就排第2位同第3位，其他依次落去嘅係自由黨、工黨、工聯會、民建聯、新民黨等等。街工梁耀忠喺10月12日因為放棄主持選舉立法會主席嘅會議，備受網民指摘，但事件似乎無破壞到受訪者觀感。


調查顯示，十大政團評分全線上升，但泛民政黨評分升幅較建制大。民主黨係泛民評分升幅最大嘅政黨，較半年前躍升7.9分至49分，由第5位升至第3位；建制升幅最高嘅係工聯會，上升4.6分至47.3分，但由於升幅不及其他泛民政黨，所以由第3位跌落第6位。


梁美芬申退出6委員會

另外，建制同泛民議員早前大舉加入各個事務委員會（事務委員會共有18個），爭奪正副主席職位，但近日已經出現「退會潮」。繼公民黨毛孟靜要求退出環境事務委員會，原本加入咗16個事務委員會嘅經民聯梁美芬，噚日就申請退出6個事務委員會，包括發展、工商同房屋等，但無交代原因。