前立會法律顧問 馬耀添代表政府 同立會打對台

【明報專訊】青年新政兩名議員嘅宣誓風波，政府除咗聘用資深大律師莫樹聯負責司法覆核嘅官司，仲新增另一資深大律師余若海，除咗兩名資深大狀，連為立法會做法律顧問多年嘅馬耀添（Jimmy，圖），今次亦代表政府，令Jimmy同舊東家打對台。


Jimmy回歸前已經喺立法局（會）工作，去年先退休，服務立法會27年。Jimmy舊年榮休時講過會好掛住立法會，仲喺海富中心租咗個向住立法會嘅辦公室，方便將來一啲工作，話要日日望住立法會大樓。估唔到一年之後，Jimmy就接咗單同立法會打對台嘅官司。有法律界人士就同Emily講，Jimmy熟悉立法會運作，喺今次官司肯定係十分搶手嘅人選。


至於資深大狀余若海，近年幫政府打唔少司法覆核嘅官司，包括黃之鋒就參選立法會選舉年齡提出嘅司法覆核許可，以及港視發牌嘅司法覆核上訴案等。而今次官司中，代表立法會主席嘅係資深大律師翟紹唐，青政嘅梁頌恆同游蕙禎，就分別由資深大律師潘熙及大律師譚俊傑做代表。