【明報專訊】就嚟11月，測驗周殺到埋身，Mama都係時候幫一對囝囡溫書啦。自問唔係虎媽，唔要求拎好高分，但溫書都少不免家嘈屋閉，為咗測驗而影響親子感情，真係好唔值得。
香港基督教女青年會家庭健康促進中心督導主任伍偉湛就安慰Mama，佢話溫書溫到發火好普遍，唔係Mama獨有嘅問題，因為現今課程較深，小朋友上堂有唔明白嘅地方，累積落嚟，測考前要追上進度係好困難，於是出現「教極都唔識」嘅情况。
為免成日躁底，家長先要認清小朋友能力，例如參考佢近期嘅功課表現，估計佢去到咩程度，期望過高只會令小朋友未溫書先放棄。「如果一向成績唔太好，好難要求佢突飛猛進。好多家長以為囝囡唔合作、唔畀心機讀書，但可能小朋友覺得自己根本做唔嚟，做極啲題目都錯，記極啲課文都唔入腦，先索性放軟手腳。」同樣道理，做練習應該由淺入深，唔好以為就嚟測驗，就嗱嗱聲畀啲高難度題目佢哋做，咁樣唔會提升水平，反而令小朋友認定做唔到，早早失去自信。
家長另一個勞氣位，係小朋友一溫書就想休息。伍偉湛建議制訂一個短期生活時間表，清楚界定溫習同休息時間，最理想做法係先聽小朋友意見，明白佢哋嘅需要，再由父母作最終決定，「家長要辨別，如果小朋友想溫15分鐘就唞1個鐘，當然唔得啦；但如果佢想溫完1個鐘後有個小休，就可以接受」。至於幾時制訂呢個時間表，佢話愈早愈好，考測前幾星期已經可以試行，畀小朋友多啲時間適應，萬一發現有唔妥當嘅地方，例如溫書時間太長，專注唔到咁耐，都仲可以微調。
孩子「做老師」教番媽咪
伍偉湛仲教路，提供咗兩個溫習方法。首先係推行獎勵計劃，「列幾條題目，小朋友揀嚟做，家長再邀請佢哋做較深嘅題目，答啱有分，儲埋換獎勵」。其次係用雙向形式溫書，「家長可以同小朋友講『我教你做一次，一陣你要教返我㗎喎』，其實係畀機會佢，將課文內容複述一次。佢複述錯咗，就及時糾正同補充，正確嘅話就讚佢，等佢感到受肯定」。聽咗咁好嘅方法，Mama今次同囝囡溫書，應該唔使咁激氣喇！
新聞類別
副刊
詳情#
回應 (0)
