陳浩濂山頂搞回收 兩噸舊物唔少貴嘢

【明報專訊】唔少人執屋時都會驚覺原來買落唔少嘢，無乜點用過就已放埋一邊，自由黨山頂區議員陳浩濂不時舉辦「循環回收大行動」，噚日佢就喺麥當勞道回收物品，足足收到山頂區居民捐出超過兩噸嘅衣物、電器及玩具等予救世軍。


不乏名牌衣物電器電腦

陳浩濂收到嘅回收物品中好多都仲好新淨，山頂區居民出名富貴，回收物品中亦不乏名牌，好似D&G、Hugo Boss、Brooks Brothers等衣物，仲有Samsung電視，Wii遊戲機、名牌行李箱及手提電腦等貴價物品。


喺立法會選舉中，陳浩濂循商界（第一）出選挑戰現任議員林健鋒但落敗，佢噚日舉辦回收活動時亦撞到商界（一）選民，原來係佢立法會選舉嘅支持者，對方就鼓勵佢繼續努力為社區同商界服務。