繼承卿姐 林卓廷變咗黨鞭

【明報專訊】民主黨喺今年立法會選舉成功由「乳鴿」接棒，但就有官場中人疑惑現時邊個係黨鞭。話說民政事務局長劉江華噚日同民主黨立法會議員食飯，席間問到邊個係黨鞭，在座黨友都話林卓廷（圖）變咗黨鞭，皆因阿廷成日督促黨友要有紀律，特別強調要準備開會。


林卓廷：唔慣劉江華叫我「廷哥」

昔日民主黨前立法會議員劉慧卿對黨友非常嚴厲，經常督促黨友堅守紀律，要準時開會，阿廷睇嚟已經繼承咗卿姐精神。不過，過去民主黨嘅黨鞭都有一定威嚴，黨友莫敢不從，究竟阿廷有無呢個江湖地位鞭策到啲黨友，就要時間觀察。


阿廷噚日同傳媒茶敘時話，自從就任立法會議員一職，唔少街坊叫佢林議員，連劉江華都叫佢「廷哥」，搞到阿廷好唔習慣，「大家都係叫我阿廷好啦」。至於同劉江華食飯，阿廷話主要都係講建築物條例，以及圍標問題等。