工聯會見特首追數 「追到天腳底」

【明報專訊】特首梁振英（CY）近日約見唔同政黨聽取佢哋對《施政報告》意見，工聯會噚日見完CY就話，對方再次承諾會喺任內處理強積金對冲，仲會再約工聯會傾一傾。工聯會會長林淑儀會後批評，工聯會過去向政府提及多個勞工政策，至今都未有進步，強調「追到天腳底都要繼續追」，但就認為特首任內「無乜可能」做晒所有承諾，但至少要有一個大方向。


CY再承諾任內處理積金對冲

理事長吳秋北會後提到就《施政報告》同《財政預算案》分別提交咗55項同14項建議，包括要求取消強積金對冲制度、爭取最低工資一年一檢、檢討侍產假同實施租務管制等。議員麥美娟話，工聯會反對坊間涉及取消遣散費、長期服務金嘅方案，而CY喺席上無對上述建議表態。


至於特首選戰同宣誓風波，麥美娟話今次雙方只談及施政建議，特首無就連任「摸底」、無提及立法會事務；但佢補充，立法會無法有效運作，所有議員都有責任。


咁到底係前日引發流會嘅建制派，抑或宣誓無效議員導致議會無法運作？林淑儀就批評，宣誓「玩嘢」嘅議員先係流會嘅始作俑者；麥美娟重申，流會唔係毫無原因，而喺捍衛國家同民族嘅大原則前，需要堅持佢哋一貫立場。