曾批拉布日嘥16萬罐午餐肉 王國興撐流會「伸張正義」

【明報專訊】建制派噚日拉隊離場引發流會，搞到劉小麗、游蕙禎及梁頌恆3名議員無法重新宣誓，社民連梁國雄就拎住一塊塊午餐肉諷刺建制派，質疑佢哋集體拖延會議。身為「午餐肉拉布論」始祖嘅工聯會王國興，噚日就開記招「打倒昨日的我」，大讚流會好啱，認為建制派係「伸張正義，值得全球全國全港華人支持」。


批長毛唔守秩序 亂掟午餐肉

王國興又話，梁國雄「不嬲唔守秩序」，喺會議廳外掟午餐肉會受公眾批評。


立法會前議員王國興在任時，曾經批評立法會嘅拉布議員，話拉布一日可以浪費255萬元公帑，足夠換取16.4萬罐午餐肉，佢喺選舉時更提出，唔開會嘅議員應該扣減人工。長毛噚日就「抄橋」諷刺建制派搞流會，仲引用王嘅名言，質問建制議員「一次拉布浪費幾多午餐肉」。


王國興發起嘅「23萬監察」（佢嘅名單喺立選取得23萬多票）噚日召開記者會，話「讚賞同大力支持」建制派搞離席流會，認為佢哋係基於「維護國家、民族、人民尊嚴」嘅大前提下被迫離場。


至於梁頌恆噚日話，議會有一個前輩，「王國興先生嘅一啲先言／先賢（Emily聽唔清楚鴨脷洲口音，判辨唔到讀音） 」，曾批評拉布浪費唔知幾多罐午餐肉。王國興噚日開記者會就反斥梁頌恆「口出狂言」，又認為佢作為立法會議員咁無良，公眾自會定奪。王國興又支持港府提出司法覆核，認為立法會主席梁君彥唔應該畀青年新政兩人再次宣誓，同時譴責二人「辱華播獨」，要求佢哋「立即向全球華人道歉下台」。