嶺大9月通訊惹爭議 讚何君堯「傑出嶺南人」文章被刪

【明報專訊】嶺南大學喺9月份大學通訊寫話有4名「傑出嶺南人」選到立法會議員，分別係校友游蕙禎、李國麟同學生羅冠聰，仲有一個係曾經話應該解散學生會嘅校董何君堯。嶺大讚揚佢哋嘅成就體現咗「作育英才，服務社會」嘅校訓。


學生會校友組：唔認同何係嶺南人

但學生會同校友關注組都發聲明，話唔認同何君堯係「嶺南人」，仲分別蒐集聯署，希望校方收回言論同道歉。


不過聯署都仲未交，嶺大校方噚日就話留意到文章引起爭議，「為使是次討論告一段落」，已經刪除篇文。


學生會會長鄭沛倫話，截至前日已經超過400個學生聯署，佢哋會繼續蒐集，因為刪文只係「hea（敷衍）下我哋，學校係唔想我哋蒐集到更加多聯署、進一步得罪何君堯，刪文係避重就輕」，佢又要求校方交代事件同道歉。嶺南校友關注組成員鄭司律就話，對校方做法覺得奇怪，雖然肯刪文係好事，但質疑學校只係為咗平息討論，冇回應到關於何君堯係咪符合「嶺南人」身分嘅質疑。


Emily都試過想問下何律師嘅睇法，不過到截稿前都搵佢唔到。