10•22警察招募日 阿sir拍片宣傳

【明報專訊】警察facebook最近出post常有驚喜，噚日又發咗一段約1分鐘嘅短片「10月22日警察招募日，你仲等咩呀？」，一開始就係兩個男生喺球場打波，顧名思義，警隊今年第3場招募日嚟緊喇。


段片故事情節好簡單，講男主角同朋友打波時，見到警察行咇經過，朋友就問佢：「你又話考警察嘅？」本身話無咩信心嘅男主角因為朋友一句「未試過又點知啫？」就下定決心投考，最終成功咗。Emily聽聞故事係由警察招募組炮製，男主角就搵咗灣仔警署嘅同事客串。


Emily記得警隊2016/17年度目標係請到約1400個警員同約200個督察，招募日請幾多要視乎當日情况。有阿sir就託Emily提提有興趣嘅朋友，招募日當日已經有初步小組同個人面試，投考要做足準備啦。