【明報專訊】教育局公布2016/17學年嘅《幼稚園及幼稚園暨幼兒中心概覽》，Mama睇睇吓發現，原來家報讀幼稚園，雜費都唔少㗎。校服、課本固然係必要，而茶點費都相當「可觀」，有學校收5000幾蚊，包埋早、午餐，亦有幼稚園收2000幾蚊，只係包一餐茶點。Mama見到當堂嚇一跳，想當年讀幼稚園，老師只係派下餅乾、麵包，偶爾有個水果食，都已經好興奮。
Mama好奇之下，去咗部分幼稚園嘅網頁，研究佢哋嘅餐單。單單計茶點，基本上每星期都有粉麵、粥、糖水，輪住食，包保唔會食厭，款式亦好講究，有雪菜雞肉上海麵、腐竹薏米雞蛋糖水等。全日制學生食得更豐富，午餐有雲耳肉片、麻婆豆腐呢類家常小菜，亦有西式意粉、咖喱等等。最正嘅係，唔少幼稚園都每日煲老火湯，大人聽到都流口水呀！
不過Mama有啲疑惑，細細個就食咁濃味，對小朋友係咪有益？保良局葵芳幼稚園暨幼兒園嘅黃慧詩校長就叫Mama放心，因為餐單係由專業營養師設計，而且唔同喺茶餐廳嗌餸食飯，幼稚園學生食嘅菜式都經過特地調校，以多菜少肉、少油、少鹽同少糖為原則，例如茄子肉碎就以茄子為主。相比起以前嘅餅乾、麵包，營養均衡得多，「良好嘅飲食習慣要從小建立，所以糖分高或者有牛油嘅零食，都唔會畀佢哋食太多」。
專人設計餐單 多菜少肉
要令平日鍾意食零食嘅小朋友肯食呢啲健康菜式，都要花啲心思。黃校長搵埋喺學校做咗12年嘅大廚藍慧蘭，同Mama分享心得。呢位「幼稚園廚神」話，小朋友有時怕啲冇顏色嘅餸菜，要吸引佢哋食，其中一個方法係「整色整水」，「以食魚為例，好多小朋友見到魚係白色就唔想食，於是我加啲紅蘿蔔、粟米上去，佢哋就食得好開心」。
幼稚園餐單亦會隨時節變化，夏季會多食瓜果，冬季食滋潤食材，例如用雪梨煲湯。過時過節就有應節食品，好似中秋節就有低糖冰皮月餅，端午節都會食糉，但將肥豬肉變成瘦肉、鹹蛋黃變成雞蛋黃。蘭姐仲會自製多蘿蔔絲少肉嘅蘿蔔糕，啱晒農曆新年食。食得美味又健康，呢班小朋友過節都分外開心啦！
新聞類別
副刊
詳情#
回應 (0)
