非建制「G27」共商大計 溝通平台擬正名「民主派會議」

【明報專訊】為咗可以方便形容自決派、本土派，以及民主派議員作為一個陣營，大家近來以「非建制派」去形容佢哋。不過，呢個名令部分民主派議員不滿，認為無法反映多年來爭取民主嘅政治立場。噚日「非建制派」議員再開會，初步傾向將新成立嘅溝通平台正名為「民主派會議」。


阿涂：定好細節再搵青政熱血

民主派溝通平台嘅名有好多前世今生，昔日叫「飯盒會」，再易名做「泛民會議」。而目前個溝通平台叫G27（Group 27，意思是有27人的組織）。其實之前G27開會都花咗唔少力氣去討論正名，初時有人提議叫「自決民主派」，也有人覺得可以叫反對派，突顯對方係「保皇黨」。


公民黨毛孟靜喺會後話，溝通平台初步定名為「民主派會議」，相信下次會議會有定案。目前溝通平台嘅召集人、民主黨涂謹申話，定好溝通平台細節後，會邀請青年新政同熱血公民嘅議員加入。