立會選主席 葉劉唔撐田二少

【明報專訊】建制派立法會議員噚日開閉門會議傾立法會主席人選，商討主席人選茲事體大，但原來開會過程都幾令人嘖嘖稱奇，包括新民黨主席葉劉淑儀喺大家面前唔撐黨友田北辰，搞到田二少好無癮。會上有人提出，不如叫梁君彥及田二少講吓理念啦，但有人話唔使，咁佢哋連簡介吓政綱嘅機會都無。


簡介理念機會都冇

呢個閉門會議，據Emily所知，首先係想選主席嘅田二少提出不如搞初選，畀大家投暗票表態支持佢定係梁君彥；但會上有人話，投明票同暗票都無分別，最終傾完一輪，大家話今次搞初選做唔切，但認為值得下次考慮做。之後，會議畀各人表態支持邊個，大部分人都話撐梁君彥，而有人報料話，曾公開話支持田二少選主席嘅葉太，就話佢當然要支持黨副主席出選啦，但接住話如果大家都支持梁君彥，咁佢都支持梁君彥！有與會者事後話，見到新民黨咁嘅表現都為之側目。


話說會議中，民建聯蔣麗芸突然提出應該畀田梁二人講吓選主席理念，如果第日會議期間有人提出港獨，做主席會點裁決先。呢項要求都幾合理，但席間有人話，大家同田梁都好熟，唔使搞咁多嘢，結果會議以時間有限等理由，搞到二人無機會發揮。


講開新民黨，佢哋噚日就率先見特首梁振英傾施政報告建議，黨主席葉劉淑儀、容海恩都有去。容海恩話，自己關注新東唔少地區車位不足嘅問題，做過保安局長嘅葉太立即插嘴話，紀律部隊「好機動㗎嘛」，好似上水有6座紀律部隊宿舍，若發生之前旺角騷亂等事件，「佢哋就要揸車飈出嚟市區」，所以停車位唔夠會好影響佢哋嘅機動性喎。


政府噚日就公布2017年《施政報告》、2017/18年度《財政預算案》一併展開諮詢，市民可入去網址（www.policyaddress.gov.hk）提供意見。