dbc走剩30幾人 員工臨別唱《一起遣散》

【明報專訊】香港數碼廣播（dbc）之前申請交還牌照，暫未獲批，今日起獲准唔製作節目，只會重播節目同埋音樂。dbc行政總裁羅燦（燦哥）噚日話，原有113名員工今日有70幾人離任，剩番30幾人會陸續喺未來兩個月離任。佢都話「好唔捨得……但大家始終都要講再見」。


燦哥話，dbc由數碼港搬去灣仔之後多咗人認識，好多人覺得節目內容非常好聽，亦得到投資者、董事局嘅讚許。佢衷心感謝一班員工，希望佢哋喺新崗位工作愉快。


一班dbc員工不斷高呼燦哥名字，後來合唱由《撐起雨傘》改編嘅《一起遣散》，「一起感嘆，不想分散 ，一起為心中的理想爭取奮鬥，道別過後要繼續起步，鬥志是終可比天高」，聽到Emily都眼濕濕。


dbc嘅2016/2017牌照年度於上月15日開始，該台須交牌照費約450萬元。通訊局話，dbc已向政府提交退還牌照申請， 要求根據其終止服務日期按比例計算牌費，局方正按相關法例和既定程序處理。