甘神父偕家長請願 爭年長子女居權

【明報專訊】多年嚟一直協助居港權家長嘅甘浩望神父（甘仔），噚日帶領爭取子女居港權家長協會去剛搬遷嘅終審法院請願同示威，同埋向終院首席法官馬道立交請願信。協會家長同Emily講，自從1999年終院判決同人大釋法後，佢哋爭取年長子女（14歲以上）居港權已十幾年，有家長甚至等唔到內地嘅仔女來港團聚就已過咗身，希望馬官向政府反映盡快喺行政上解決家庭團聚呢個咁基本嘅權利。


除咗協會家長為咗仔女一直鍥而不捨爭取之外，其實Emily覺得甘仔都好有心，十幾年嚟都咁支持居港權家長協會。協會又話，佢哋曾經申請法援再為呢件事打官司，但都被拒批法援，亦都問過法律意見，但似乎都覺得無得打。Emily見到班家長年紀都真係唔細，呢個問題當然牽涉好複雜嘅法律、政治同社會問題，不過對呢班家長嚟講，佢哋只係希望同內地仔女團聚，但實際上又無咩可以再做，Emily睇見都覺得無奈。