點確保政府有錢？ 財爺：繼續由我做預算

【明報專訊】財政司長曾俊華噚日接受專業聯盟邀請，喺午餐會上講點樣確保政府有足夠收入應付長遠需要。可能之前喺立會做「開槍」手勢令佢帶嚟好多曝光，財爺喺午餐會亦好鬼風騷，自嘲每年估算政府嘅收入，預算同實際數字差額都「相當可觀」，仲話回應講題好簡單，「就係繼續由我做財政司長，繼續為政府做預算，問題就可以解決」。


開新稅要考「政治膽量」

現場嘅人唔少要交好多稅，聽到年年估錯盈餘嘅財爺咁講，真係唔知好嬲定好笑。好彩財爺即刻補鑊，話明白佢個講法未必咁受歡迎，所以為咗和諧、減低「用餐時撕裂」嘅可能性，決定只講吓原則睇法。佢又話，唔想直接「傷害大家感情同荷包」，要再嚟聯盟食「免費午餐」咁話！


醫學會前會長謝鴻興醫生就炮轟財爺咁多盈餘，點解近日都幾次提起加稅，又引述有人話財爺係守財奴。有會計師學會代表要求政府開新稅，問今屆政府有無咁嘅膽量，財爺承認「政治膽量」係因素之一，又話要考慮稅務問題會唔會影響競爭力。