煲呔終於食到肉骨茶

【明報專訊】前特首曾蔭權（煲呔）2006年出訪新加坡，曾約記者去當地馳名嘅黃亞細肉骨茶餐室茶敘，被踢爆當地外交部向黃亞細施壓，要求茶餐室延長營業時間招呼「煲呔」，不過對方無屈服，搞到「煲呔」食閉門羹。


Emily噚日去黃亞細食飯，當年「好有性格」只係由朝早6點開到下午2點，原來多年後嘅今日已經變成朝七晚十，舖頭亦明顯裝修過，又由以前嘅相連兩個舖位變咗做一個舖位。


舖內名人照 馬英九大過煲呔

作為記者，Emily一坐低當然就想搵下老闆「黃亞細」黃錫海做個訪問，不過佢唔喺度，咁Emily就同店員打下牙骱，發現原來「煲呔」舊年終於「食到」黃亞細。


店員仲指住牆上嘅名人照片，見到無打煲呔嘅「煲呔」 笑得幾開心，唔似有心事，仲同老闆影相。店員話煲呔當日除咗點肉骨茶，仲點咗啲小菜。除咗煲呔，原來台灣總統馬英九都係座上客，張相仲大過煲呔；仲有前保安局長李少光、藝人孫燕姿同譚詠麟，但就唔見李光耀嘅相。如果總理李顯龍半夜想食黃亞細，舖頭會唔會開門畀佢？店員就叫我問番老闆。


至於黃亞細肉骨茶好唔好食？Emily就覺得見仁見智，不過就唔平，要成7.5至8.5坡紙一碗，即係要四五十蚊港幣。