談暴動坐監 曾德成﹕何犯罪之有？

【明報專訊】早排教育局長吳克儉突然「提醒」教師及學生話佔領中環係違法活動，「叮囑」參加者小心前途，有網民用六七暴動期間被捕入獄嘅民政事務局長曾德成做例子，話有案底都可以做局長。過來人曾德成噚日剖白，話自己當年只係派傳單，「何犯罪之有呢？」


判囚兩年「只係派反殖傳單」

曾局長噚日去咗出席經民聯葵青區議員方平及譚惠珍辦事處開幕禮，活動後記者把握機會問一向甚少評論六七暴動嘅佢點睇吳克儉言論，佢話支持學生關注社會，同時關注學生嘅健康成長，認為吳克儉叫老師、學生守法只係履行職責。


叫大家理性分析吳克儉說法

最關鍵嘅當然係問曾局長身為過來人嘅睇法啦，局長反問記者有無查閱資料，佢當年只係喺「學校裏面派發自己油印嘅反對殖民主義嘅傳單」，話「犯了什麼罪呢？何犯罪之有呢？」仲叫大家理性分析吳克儉嘅說法。


回憶往事，曾局長似有點感慨，答咗兩條問題就想走人，記者再追問，佢就回應話「我講咗好多了」。曾德成當年係聖保羅書院學生，因為派傳單一事被判囚兩年。


另一邊廂，保安局長黎棟國噚日出席活動時，都被問到教師喺課堂講解佔中係咪等於教唆人犯法，佢話最重要係態度中立、理性分析，如要實地觀察佔中就要視乎活動具體情况，但咩活動都要照顧參加者嘅安全。