伍姑娘法庭做功課

【明報專訊】伍姑娘（伍詠薇）噚日突然現身信興電器前主席蒙民偉嘅民事上訴官司，法庭版同事見到佢都打個突，唔通佢有份爭產？細問之下，至知其實伍姑娘係嚟學嘢，原來佢下星期會開拍新劇《傳愛事務所》，佢飾演審民事案嘅法官，而且同飾演大律師嘅陳豪、黎耀祥「傳愛」，互有感情戲，陳法拉都有份演出做見習大律師。


專心抄筆記學嘢

同事話畀Emily聽，伍姑娘噚日非常專心聽審，一啲都無夢遊或者瞌眼瞓，當三位上訴庭法官出聲講嘢，伍姑娘就特別留心，而且仲抄埋筆記。


同事仲同伍姑娘講，無綫拍法庭戲時，飾演法庭記者嘅臨記同現實嘅法庭記者差好遠，真正法庭記者唔會只係一味低頭抄抄抄。伍姑娘笑住咁話，第時開拍一定會好好監督佢哋﹗雖然大家都知呢啲嘢唔到伍姑娘控制，不過都得一眾行家好開心。