十個不給人情的藉口

【明報專訊】
1. 喂喂喂我講單嘢你知﹗有幾條友睇咗黑紙百科，話學咗幾招嚟走人情數，你自己小心啦﹗嗱，是非當人情，我畀咗人情你㗎喇﹗

2. 利是封入面嘅係小小人情……味，希望你鍾意聞。

3. 係唔係覺得我好厚禮呢？梗係啦，你估人情真係紙咁薄咩？ 我特登封五蚊銀㗎﹗

4. Sorry，上星期我屋企有單白事，你畀番一蚊我當無數啦，大家咁熟！

5. 畀人情你咪盞畀你老婆沒收，不如我之後介紹個情人畀你咪仲實際！

6. 你有聽過「賣人情」嗎？你用錢買我啲人情啦﹗起碼五百﹗

7. 人在人情在，既然我都嚟咗，又何必要我再畀人情呢？

8. 我結婚嘅話都唔會擺酒，我擺酒嘅話都唔會請你，無數。

9. 我想畀一千蚊人情你，不過我搭的士趕過嚟用咗一百蚊，我嚟到要應酬啲好耐冇見嘅舊同學，收番三百都唔係好過分，呀仲有你哋條sweet sweet短片入面有我十年前讀書時嘅樣，出鏡費六百蚊走唔甩，走嘅時候太夜又要用多一百蚊搭的士， 加埋千一，但算喇咁多年兄弟，唔使畀番一百蚊我啦！

10. 其實我真係唔使乜嘢藉口，大佬你已經第二次請我飲喇

文、圖 黑紙 email@blackpaper.com.hk