國際美酒展入場限年齡

【明報專訊】唔少港人平時都鍾意飲兩杯，近年流行品酒，玩吓唔同形狀嘅酒杯。繼本月初喺西九嘅美酒佳餚巡禮，貿易發展局近期舉辦嘅第5屆國際美酒展，今日喺會展向公眾開放，不過入場人士要年滿18歲，入場費200元，可獲贈一隻價值110元嘅酒杯，先到先得。


入場送110元酒杯

美酒展前日開幕，吸引咗來自36個國家及地區、共950幾間參展商展出全球佳釀、酒杯器皿等。由於首兩日只係開放畀業內人士交流，到今日至會向公眾開放。今日環節聽落都幾吸引，除咗有品評中國酒工作坊、日本清酒研討會同葡萄酒初階研習班等，仲有「我最喜愛的美酒」選舉，公眾可參與投票，從中了解港人口味。