民記一晚籌2020萬

【明報專訊】民建聯噚晚喺君悅酒店舉行20周年籌款晚宴，特首梁振英伉儷、三司及政商領袖畀面出席。未開餐，主席譚耀宗先嚟棟篤笑，話嘉賓去得籌款晚會，就要有心理準備畀佢哋「抽水」要捐獻，但就話民建聯有學財政司長嘅「財政紀律」，保證籌到嘅錢用嚟出糧畀170名職員，唔喺用嚟派「蛇齋餅糉」。民建聯一晚就籌到2020萬元，真係恨死隔籬。


CY唱歌「貢獻」300萬

晚會好多「抽水」項目，包括由6個立會新丁獻唱，由一襲紅裙嘅葛珮帆帶住出場，每人幾句合唱李克勤名曲《紅日》。近期人氣急升嘅鍾樹根繼續搞笑，手執貓紙都唱錯key，連佢自己都忍唔住笑。不過論搶鏡，點都唔及前主席曾鈺成，繼今年6月再度為黨獻身，同太太一唱一舞，佢唱羅文《紅棉》，舞蹈老師嘅曾太伍嘉敏伴舞。佢可能有少少緊張，唱到甩嘴，但佢畢竟能言善辯，話係刻意甩嘴，證明自己唱live絕無「咪嘴」，籌得88萬元。


民建聯成立20年，晚會目標係籌2000萬元，睇番嘉賓陣容，要達標真係唔難，CY同幾個局長上台唱咗兩首歌，咁就籌咗300萬，有人就話難怪民建聯肯成日支持CY啦！

會上仲有拍賣，台下來賓都好識做，中聯辦主任李剛嘅一幅水墨畫以100萬元拍出；其後李剛捐出京奧火炬，更拍到200萬元，成為全場最高價物品之一。


敗選立會嘅副主席劉江華，遊完埠現身晚宴，大家都關心佢去向，佢話仲考慮緊各方面可能，包括讀書同入政府；近排忙於黨務，包括幫手沙田區議會鞍泰選區補選。噚晚佢捐出「上善」二字墨寶，來賓以200萬元投得。