捐血睇嘩鬼又食又拎

【明報專訊】話咁快下周三（31日）又係萬聖節，成日搵人捐血嘅香港紅十字會亦搞搞新意思應節，佢哋嘅輸血服務中心明日（27日）率先喺旺角銀城廣場11樓捐血站，晚上6點半至9點半舉行「嘩鬼捐血夜」，到時捐血站將會有一班「嘩鬼」為到場捐血嘅市民「慶賀」萬聖節，市民可以一面捐血一面感受詭異氣氛，場內亦有小食、萬聖節特飲等提供。


市民捐完血後，更會獲捐血站贈送「萬聖節鬼馬電話座」一個，場內亦有盞鬼攝影師，為捐血者拍攝歡樂時刻，等市民留下呢次捐血嘅難忘回憶。


盞鬼攝影師影相

除咗捐血夜，輸血服務中心旗下所有捐血站亦由今日起至31號換上萬聖節新裝，即使市民去唔到旺角捐血站捐血，亦可以喺其他捐血站感受萬聖節氣氛。市民有興趣知道更多詳情，可以瀏覽中心網頁www.ha.org.hk/rcbts或致電2710 1234查詢。