法巴人氣靚女傳已離職

【明報專訊】前日同大家講過嗰位喺「彭博機」做咗人氣王，傳說中嘅法巴靚女王菲（譯音，Wang Fei）之後，小琴收到唔少金融界朋友嘅電話，聽到各式各樣嘅傳言。不過，噚日最轟動嘅傳聞，就係有個朋友仔話王菲被炒了。


小琴心知不妙，唔通前日篇文「見光死」，唔小心打爛咗人哋個飯碗。跟手打去搵法巴嘅人證實下，可惜收到消息嗰陣已接近放工時間，都好難去確認單料係堅定流。不過，之前仲可以發到電郵畀呢位靚女，但噚日就彈返轉頭，若果佢唔喺轉咗電郵地址，就可能真係離職了。


通行都識佢 好受歡迎

唔講唔知，王小姐原來真係通行都識，基本上同啲「芬佬」、「賓架」傾開，好多人都知法巴有美女。有人就話佢真人好靚女，所以好受歡迎，但亦都有人話見過真人之後，覺得都係普通女仔一個，無佢自己擺出嚟啲相咁標青。


其實靚唔靚女真係各花入各眼，有朋友搵咗一、兩張王小姐嘅日常生活照畀小琴睇，的確相當標緻，但略有PS （執過相）嘅痕迹。睇番「彭博機」個MVP榜，截到噚日為止，差唔多突破9000次點擊大關，人氣依然係咁旺盛。


email:piano@mingpao.com