建制擺烏龍 選行管會派突人

【明報專訊】立法會多個委員會，早前喺激烈競爭下選出正、副主席或者委員，由於不時出現與協調結果不符嘅情况，搞到建制派同民主派關係唔多好，但聽日內委會上會選出加入行政管理委員會嘅議員，目前出現11人爭10個位局面，而11人中建制派有7人報名，4個係泛民。


行管會成員共有13人，根據協調，建制同民主派比例係8﹕5，而立法會主席曾鈺成、內會主席梁君彥同副主席湯家驊都係當然成員，所以其他議員要加入，應該係建制派6人、民主派4人。


但睇番秘書處嘅文件，建制派嘅石禮謙、黃定光、陳健波、葉國謙、田北俊、吳亮星同謝偉銓都有報名，民主派就有劉慧卿、陳家洛、何秀蘭同莫乃光。梁家傑預料，建制派有7人報名唔符合協調結果，但佢相信到內委會選時，或會有人退出，如果無，即係民主派有自由選擇權。


葉國謙：有人會退出

民建聯葉國謙就話，建制派有人擺烏龍，所以先出現多咗1個人報名情况，佢強調會尊重協調結果，有人會自動退出，確保建制泛民比例不變。


行政管理委員會顧名思義係處理立法會嘅行政管理，好似上屆立會要處理新大樓搬遷，公開徵集藝術品，甚至處理記者喺立會嘅採訪範圍等，雖然係內部事情，但隨時都可以好有爭議㗎，2009年時就曾經否決將丹麥雕塑家高志活送贈嘅「民主的碎片」雕像，擺放喺立法會大樓內。