陸恭蕙自嘲中文差

【明報專訊】前立法局議員陸恭蕙噚日重返立法會出席環境事務委員會，今次當然唔係坐議員席，因為佢已做咗副環境局長，出席委員會係回應議員提問。Christine可能平日少講廣東話，噚日用廣東話發言，夾雜唔少英文，仲要主席何秀蘭幫手翻譯，都幾尷尬。何秀蘭後來提醒全體議員同官員，尤其係新丁，因為會議係透過電子傳媒轉播，唔好中英夾雜，仲會令翻譯員無所適從。


Christine後來都忍唔住笑自己，唔單止中英夾雜，講嘢速度亦太慢，搞到唔可以喺有限時間內充分回應議員提問，佢話以後開多啲會，相信會有改善。其實Christine毋須自責，佢未做副局長前係思匯政策研究行政總監，喺記者會主要講英文，Emily覺得佢噚日全程講廣東話算流暢，偶有沙石，唔算嚴重。