工程界4子 全部港大製造

【明報專訊】今屆4名立法會工程界候選人政見唔同，但原來背景都一樣，都係港大仔；當中3個，即係何鍾泰、陸宏廣同埋黎廣德，仲要喺同一間宿舍住過。至於盧偉國就同人唔同命，無得住宿舍，要孖住同學喺西環合租舊樓單位。


何鍾泰係大師兄

4名工程師噚日現身《明報》選舉論壇。4人雖然話係道不同，但表現得好客氣，發言都斯斯文文，Emily到場八卦一下，先知道佢哋都係港大出品。當然，佢哋幾個出品年代不同，73歲嘅何鍾泰梗係大師兄。講起港大，4人有傾有笑，因為當中3個都係聖約翰宿舍（St.John's College）舊生，而聖約翰咁啱今年慶祝成立100周年。何鍾泰仲話，佢有捐錢畀宿舍，所以有一間房嘅門口係掛住佢個名牌。


盧偉國舊樓當宿舍

盧偉國當年無得住宿舍，要喺西環租樓住，但佢話當年租樓，唔同家嘅板間房或劏房，而係一個單位大家分租房間，共用廚廁，所以無改動間格，應該無違法。