丁偉銓嘆核數師做人難

【明報專訊】接替張智媛出任會計師公會行政總裁嘅丁偉銓（洋名Raphael），今個月1號履新，小琴尋日同新官茶敍，話題自然離不開中環熱話匯控（0005）涉及洗黑錢，事件令人關注公司嘅合規部門其實好緊要，丁偉銓就好感慨咁話，如果合規部得唔到公司支持，其實係好鬼淒涼，核數師同合規部就同病相憐喎！

同合規部同病相憐

阿Raphael解釋，合規部門平時如果呢樣果樣都唔做得，前線、市場部甚至後勤人員，都會覺得呢個部門阻住地球轉，但到出事時，大家又會第一時間話合規部門辦事不力咁。


核數師情况亦相似，如果有個客，合伙人覺得唔可以做，但個客轉頭簽咗第二間行，如果都係啲大行，老闆就會問點解人地都做我哋唔做，即時孭鑊。但係過咗幾年間公司爆煲，老闆一係可能唔記得呢件事，甚至乎已經換咗人，唔使旨意會有人讚當日做決定的合伙人英明。所以合規部同核數師好多時都係啞子吃黃連㗎。