內地基金公司新招 搵靚女街頭報收益

【明報專訊】小琴有唔少朋友都響手機度裝咗個叫「美女報時」嘅程式，內容係響街頭搵靚女拎住張寫上唔同時間嘅牌嚟報時，但勢估唔到呢條橋都可以用響基金公司度，內地有間叫匯添富嘅基金管理公司，最近就為佢哋嘅30日期理財產品搞咗個靚女報收益率。


為收宣傳之效，間公司每日會搵來自北京、上海、廣東、南京同杭州等地嘅街頭靚女，拎住塊寫住最新收益率嘅報告板影相，然後放張相響公司網站。


女仔養眼 收益冇眼睇

講到噱頭，唔少投資者同網民都話，由靚女去報告枯燥無味嘅收益數字，創意就100分，之不過咁，啲網民都好眉精眼企，佢哋話，間公司搵嘅女仔就愈嚟愈養眼，可惜隻理財產品嘅表現就愈嚟愈冇眼睇，最早嗰陣年收益率都仲有4.022%，最新個回報已經得返3.571%，唔怪得有人建議間公司員工唔好理財，改行做星探。