基金經理笑言 市靜最啱湊女

【明報專訊】傳統上龍年好似特別多人生兒育女，搞到年初嗰陣一堆「龍B」概念股都炒番轉。小琴最近八卦到，有兩位基金經理齊齊初為人父，仲要咁啱得啱「翹」，都係弄瓦之喜，生咗囡囡。
「其實冇特別plan過，都係順其自然啦」信安嘅朱加城，同小琴講唔係跟潮流要生「龍B」。佢個囡囡早排滿月，一講起就即刻會心微笑，佢仲話湊女係一門大學問，自己都仲學緊。
另一位爸爸就係霸菱嘅方偉昌，今次佢仲雙喜臨門，一生就係對孖女。「私人時間都會用喺佢哋身上，要幫下老婆手，等佢唔使咁辛苦。」佢仲講笑話，呢排市靜最啱湊女。
小琴一向認為基金經理成日要諗點投資，對點教仔女都一定會好有部署，話唔定仲係怪獸家長嚟。點知兩位爸爸都話，最緊要囡囡開開心心長大，唔會畀好大壓力佢哋。會唔會追多個，兩個人異口同聲話：「暫時唔諗住喇」。