吳光正滑雪受傷無恙

【明報專訊】會德豐（0004）主席吳光正平日好低調，就算公司業績會都鮮有露面。不過，小琴就八到，吳光正早排去滑雪受咗傷，仲斷咗骨，瞓咗好幾日醫院。公司主席入院呢啲隨時係股價敏感消息，小琴第一時間打畀公司副主席，即係堅叔梁志堅問個究竟。


堅叔證實，吳光正早排的確喺滑雪時受傷，咁小琴問係咪跌斷腳咁陰功？見慣大場面嘅堅叔就輕描淡寫話，主席只係撞親啫，上星期已經復工，亦如常工作、開會。小琴記得，吳光正大仔吳宗權舊年新年，喺石澳沙灘跑步時勇救遇溺婆婆嘅消息，咁睇嚟，佢哋兩父子都好熱愛運動噃。過咗檔啱啱3個幾月嘅堅叔又話，早幾日梁高美懿卸任恒生銀行（0011）副董事長兼行政總裁個farewell party，吳主席都有出席喎！