中國融保街貨唔夠1％

【明報專訊】港股又跌過，小琴早兩日同個金融界朋友傾開，先話近排冇咩好炒，朋友仔就話有隻喺內地做放數嘅中國融保金融（8090）股價表現相當靚仔，業務又有概念，可惜未買到已升到砰砰聲。多得證監會噚日公布，原來融保金融「真正」街貨唔夠總股本1個巴仙，唔怪得小琴個朋友買唔到啦！


根據證監嘅調查，喺今年4月26日，有12個股東揸住融保金融3億幾股，相當於24.34％股權，加上公司原本兩名主要股東揸七成半，即係話融保金融只得0.66%（千幾萬股）係由其他投資者持有。


其實證監會時不時都會公布有啲咩股份股權高度集中，但集中到「街貨」唔夠1%嘅，就真係少之又少。小琴係咁意搵吓資料，發現對上一次有股份高度集中成咁嘅，已經係2009年嘅英皇娛樂（8078），當時「街貨」得0.94%，都多過融保金融。


融保金融今年1月以配售形式上市，證監話佢掛牌當日收市價係0.445元，但由3月1日起股價開始坐火箭，至5月4日即係上周五已經升咗成1.4倍，至0.67元，呼籲投資者審慎。唔知係咪因為咁，隻股份噚日跌咗6%。