保護瀕危物種 － 豬籠草 𝑁𝑒𝑝𝑒𝑛𝑡ℎ𝑒𝑠 𝑠𝑝𝑝

豬籠草 泛指豬籠草科豬籠草屬大約170個品種嘅食肉植物，佢哋嘅葉片中脈末端會生長成圓柱形、卵形、球形或漏斗形嘅器官，用嚟消化食物同吸收營養。因為呢個器官形狀似豬籠，所以叫豬籠草。

除咗昆蟲，豬籠草亦會意外捉到蜥蝪、蛙、甚至老鼠之類嘅小動物。而個別物種（例如拉賈豬籠草）則會用共生方式，以「豬籠」提供食物或休息嘅地方，動物留低嘅排泄物就成為豬籠草嘅營養補充劑。

香港唯一嘅原生豬籠草品種𝑁𝑒𝑝𝑒𝑛𝑡ℎ𝑒𝑠 𝑚𝑖𝑟𝑎𝑏𝑖𝑙𝑖𝑠，鍾意溫暖潮濕嘅環境，多數生長喺沼澤濕地嘅草叢同石罅之中，屬於一百種香港稀有及珍貴植物之一。𝑁𝑒𝑝𝑒𝑛𝑡ℎ𝑒𝑠 𝑚𝑖𝑟𝑎𝑏𝑖𝑙𝑖𝑠零星分布喺廣東南部沿海嘅沼澤地，但受到濕地開發同人為破壞影響，又經常被挖掘嚟做觀賞植物，導致分布範圍同種群都慢慢縮細。

除咗卡西豬籠草同拉賈豬籠草屬於《瀕危野生動植物種國際貿易公約》(《公約》)附錄I嘅列明物種，其餘所有豬籠草品種都屬《公約》附錄II嘅列明物種，任何人如果冇按照《保護瀕危動植物物種條例》嘅規定進口、出口、再出口或者管有豬籠草，均屬違法。違反《保護瀕危動植物物種條例》若被定罪，最高罰款為港幣一千萬元同監禁十年，有關物品亦會被充公，大家要注意啊！