先冰敷後熱敷　加快復原

【蘋果日報】行山受傷點算好？市民要記得R.I.C.E. 4個步驟。骨科專科醫生梁漢邦表示，受傷後要即時停下休息（Rest），進行冰敷（Ice），用彈性繃帶固定患處加壓（Compression），然後抬高患處（Elevation）幫助消腫及減痛，落山宜找同行友人扶持或求助，不應勉強繼續行山。
受傷首數天宜冰敷，可每日進行3至4次，每次約10分鐘。傷後約一星期便要改熱敷，同樣可每日進行3至4次，每次維持約10分鐘，可促進血液循環，加快復原。市民切忌搞亂冷敷及熱敷次序，否則影響復原。若患處持續6至8星期仍未有好轉，甚至疼痛加劇，應盡快求醫。
每周拗柴　婦穿高跟鞋斷韌帶
梁指，曾有一名中年女士，雙腳有慣性拗柴問題，估計與本身韌帶較鬆有關，情況更日漸變得嚴重，幾乎每星期都會拗柴，她有一次跟朋友一起行山，行足全日，全程不停拗柴。
該病人之後返工因穿高跟鞋腳痛及不穩定，「覺得成個人會舂落去咁」而需要求診，診斷證實有部份韌帶已斷裂。女病人需做手術重組受傷的韌帶，情況才改善，拗柴次數也減少。
■記者梁麗兒