操盤手札記：跌市之逆流大叔

【蘋果日報】
擘面先兆！喺美國國務卿蓬佩奧訪華前夕，央媽突然降準，除咗着眼實體經濟，似乎亦係為中美關係惡化做定維穩。黃金周期間，上周一美國海軍披露中美軍艦南海對峙；上周四美國副總統彭斯發表討華檄文；同日又爆出中國間諜晶片疑雲。睇嚟就算中美埋枱傾，都會反枱。
另外，美國聯儲局主席鮑威爾放鷹，美國10年期債息創7年新高。加息預期升溫，套息交易資金回流美國，不利新興市場。周一，內地假後復市，由於中美貨幣政策背馳，降準增加人民幣貶值壓力，滙價一度失守6.91關，A股急跌3.7%，港股陪跌1.4%。
美國加息步伐，要睇通脹；通脹走向，要睇貿易戰同油價，兩者都有可能令物價大幅上漲，從而令加息步伐加快，以致美元資產受壓。貿易戰同中美問題已經夠煩，石油供應同美伊問題仲煩。中美軍艦喺南海對峙，仍會閃避；美伊軍艦喺霍爾木茲海峽對峙，開火都似。
美國11月將對伊朗石油出口制裁，油價上周創4年新高，高盛預計，油價直到年底都會企穩80美元樓上。油價、通脹、息口趨升，新興市場難捱。大市唔多樂觀，個股有冇得諗？當無風險利率──美國10年期債息上到3.2厘，喺股市搵食，尤其熊市，更要諗真。
收息股向來係股海中嘅逆流大叔，但近排惹嚟炒作，部份因股價炒高，股息率已跌穿3.2厘，股價短期會有壓力。高息股中，仍有繼續逆流而上者，例如互太紡織（1382）。互太係紡織製衣龍頭，長期大客包括Uniqlo、Victoria's Secret、Walmart等，生意有保障。
互太部份廠房設於東南亞同南亞，基本上唔受中美貿易戰影響，大和同麥格理都出報告睇好。該股上周五升4%，周一再升1.8%，突破旗形，現價7.23元，股息率7厘，回至7元可吼。
割柑人
本欄逢周二刊出