退休未忘政　李鵬飛：建制派要企香港呢邊

【蘋果日報】2001年起擔任港台《議事論事》節目主持的李鵬飛，今年7月告別節目光榮退休，「唔使做主持，真係甩身嘞，可以逍遙快活」。安坐在尖沙嘴的辦公室內，78歲的政壇元老李鵬飛，枱頭放着攤開了的報紙，拿着放大鏡逐字細嚐。邊說對政事「冇眼睇」會更快樂，邊對中央對港全面收緊管治權未能釋懷，始終是一個年代的承諾，說好了的一國兩制變形走樣，過渡期間為此奔走的飛哥難免神傷，可以預視兩制下的衝突仍不絕，飛哥冀望建制派「一定要企喺香港呢一邊！」
見西環干政「好唔開心」
從政近40年，政治癮終究斬不斷。闊別幕前的飛哥幾乎每天中午約12時便返回尖東辦公室，閱報上網聽收音機，「12點就聽新聞、3點就聽劉銳紹嘅《中國點點點》，4點零就返屋企，屋企個書房我都未用過，有個office吖嘛，咪避屋企人遠啲囉，哈哈哈」。不做主持一身輕，飛哥坦言「最緊要冇壓力」，「做節目要有準備，要主持又要諗定問啲乜，直播節目更加唔錯得。有次（主持直播節目）我連劉兆佳個名都諗唔起，最尾要自己打自己啦！」
由踏入政壇到退休，政治局勢始終理還亂，雖說刻下冷眼政事，飛哥自覺退休了「唔關我事」，「當你冇眼睇，你覺得自己會快樂好多，使乜咁勞氣呢？」但邊談香港發展，還是笑中有氣，尤其談及回歸後的香港定位，「中聯辦本來係聯絡辦公室之嘛，而家變咗話事辦公室，又話西環中環要行埋一齊，香港人聽到、尤其我哋啲老嘢，好唔開心㗎嘛……到咗30幾年後退落嚟，先至清醒，原來呢個特區政府冇話事（權）喎，咁咪惟有算數囉！」
曾任行政立法兩局議員，飛哥過渡期間多次因香港回歸問題與時任英國首相戴卓爾夫人交手，憶述當年均以香港利益為優先，「我話如果香港利益受損，無論乜政策，都當佢死嘅」。時移勢易，現在當權的建制派在他眼中「只有目的、冇咗目標」，並非以民意角度為出發點，例如反對以特權法調查港鐵沙中綫的工程問題，飛哥就難以理解，質疑凡事聽從西環或者北京旨意，「因為你（建制派）有某啲位置要攞到」，「但我認為作為立法會議員，最緊要幫香港人出聲吖嘛，要為香港人服務」。
堅持與兩局舊友聚會
暢談近句鐘，飛哥仍然滔滔不絕，「23條一定嚟㗎，你話香港人點會唔驚？CY最想製造呢樣矛盾，上任特首係鬥爭能手嘛。特首呢個位都好難做，林鄭做可能着數啲」。
與記者傾到近4時，又是飛哥「下班」休息時；雖然中氣仍十足，體力始終不及當年，「好多人約我嗰啲應酬，我都推咗」，惟與大Sir鍾士元及行政兩局議員的聚會，像《基本法》一樣50年不變，「大Sir今年101歲；鄭漢鈞91、招顯洸都90（歲），謝志偉就84歲，我78歲，最細係我呀！」
■記者許偉賢