各大輪商阿頭 齊玩音樂椅

【明報專訊】輪場一向久唔久就玩吓音樂椅，中銀國際最近便請到休息咗一年多嘅第一代輪王雷裕武重出江湖，喺今年6月出任中銀國際金融產品部執行董事，主要負責衍生工具業務。

雷裕武小休後加盟中銀

其他輪商代言人，也開始陸續有移動，踏入開學日子，唔少代言人也「轉校」去。小琴噚日與輪商傾開，得悉德意志銀行環球市場投資產品董事孫明哲（Gary Suen），啱啱離開德銀。小琴2004年認識Gary，唔經唔覺佢喺德銀已有6年日子，今次轉投他行，相信會想接受另一個挑戰。

而佢最新動向，係將入主高盛衍生產品部，現時高盛代言人、高盛香港證券衍生產品主管郭強，以往係一位交易員，但因為輪后李頌慈離職，走馬上任做高盛衍生產品主管，可能郭強鍾意交易員工作，所以要求調盤房，做番其交易員工作。

德銀孫明哲轉去高盛

至於，德銀衍生工具部空缺，就由前瑞銀集團董事總經理李輝敏出任，李輝敏係瑞銀風險管理產品銷售部董事總經理于正人上司，負責管理結構性理財產品部，雖然，佢要管理亞洲衍生工具部外，也要負責發展交易所買賣基金ETF業務，憑其豐富經驗，應付新工作應該無難度。噚日，更代表德銀出席韓國牛熊證首日掛牌活動。