博士蛙影子股隆成 股壇長毛增持定博炒

【明報專訊】新股市場靜咗一排之後，未來一、兩個星期又會開始熱鬧起來。眾多新股之中，小琴覺得比較有概念嘅係做童裝嘅博士蛙。呢排市場已經熱話，專門製造及分銷嬰兒車嘅隆成集團（1225），係博士蛙嘅影子股。股壇長毛David Webb係隆成嘅主要股東之一，原來佢已早着先機，上月底入市增持隆成。

據港交所最近嘅股權披露資料顯示，David於8月31日，以平均每股作價1.16元，增持咗40萬股隆成，涉資約46.4萬元，增持後，其持股量由原本的4498.8萬股或5.99％，上升至4538.8萬股或6.05％。以噚日收市價計，佢持有嘅股份市值高達5628萬元咁多。

股民跟風 昨成交激增

隆成股價噚日開始見到有異動，收市報1.24元，急升10％，成交股數激增至5649萬股，涉及金額6850萬，比起平時嘅成交增加3至4倍咁多，唔知係咪有人亦開始追入，將隆成當作博士蛙嘅影子股咁炒，不過，噚日買入，已經慢咗David一大步。

睇番David持有隆成嘅歷史都算長。據港交所資料，佢嘅大名出現喺隆成嘅主要股東榜上，要追溯到2006年4月，佢一直持有股份，未有點沽過，都算係長線投資者。

隆成專門設計、製造及銷售一系列嬰兒及學前產品，包括嬰兒車、嬰兒牀及圍欄、軟類製品、高腳椅、搖椅、嬰幼兒汽車座椅、電動騎行車及其他配套產品。今年上半年公司營業額為8.1億元，按年升26％，創歷史新高，純利為5910萬，按年急升69％。

報料電郵﹕piano@mingpao.com