無懼票房 星爺長七推電視劇

【明報專訊】星爺將其前作《長江七號》重新創作，成為卡通片《長江七號愛地球》，可惜喺內地嘅票房似乎麻麻，但毫無阻礙星爺雄心壯志，星爺更計劃推出《長七》卡通片劇集，希望明年可與內地觀眾見面。

冀明年底前推出

星爺噚日出席由佢擔任執董嘅上市帝通國際（8220，將改名「比高」）股東會，該公司也正是《長七》卡通投資者。會後佢對記者講，希望明年底前推出《長七》卡通電影劇集版，現已開始籌備，等緊國家審批。佢話，目的係想將呢部卡通帶入小朋友家中，令「七仔」成為家傳戶曉嘅卡通人物。

反駁票房不理想 星爺：同期國產動畫第三

對於有人話《長七》卡通電影票房欠佳，星爺就反駁︰「套戲喺同期國產動畫排行第三，所以說票房唔理想，係唔啱嘅。」

然而，根據內地網站「網易」票房排行榜，《長七》卡通版在上周，即7月26日至8月1日嘅一周內，已跌出頭九位。而截至7月25日，上映17日，票房累計1620萬元（人民幣．下同）。而迪士尼與Pixar嘅《玩具總動員3》（港譯《反斗奇兵3》），截至8月1日，上映個多月，內地票房累計已達1.094億元，與《長七》卡通版相比，確實差天共地。