意國銀行多現金

【明報專訊】今年5月，喺意大利第三大城市都靈，發生一宗打劫銀行奇案。有個41歲嘅媽媽，湊住7個月嘅BB到銀行，先將BB擺喺架車內，然後自己打劫銀行。一日之內，成功打劫咗3間銀行，到打劫第4間銀行，先至失手被捕。呢位女士向當地警方話，佢打劫係因為工作收入唔穩定，唔知點樣可以照顧到BB。其實，呢件事只係意大利銀行劫案嘅冰山一角。「彭博」報道，以市值計，意大利最大嘅銀行，喺歐盟來講排名不超過第9名，之但係，意大利銀行劫案卻係全歐盟最多。根據最新報告指出，09年意大利共有1744案銀行劫案，佔歐盟銀行劫案近半，亦係德國嘅6倍、英國嘅20倍。09年共損失3680萬歐元。專家：意國銀行保安差易得手點解意大利咁多劫案？據當地保安專家話，其中一個重要原因係銀行嘅數目太多，好多銀行都冇乜警員巡邏。例如Intesa Sanpaolo SpA，係意大利最多分行嘅銀行，單單喺意大利，就有5921間分行，數目比法國BNP Paribas SA多2倍。而且，意大利嘅銀行一般都有太多現金擺喺分行內。雖然銀行每年花唔少錢加強保安設施，之但係，因為分行太多，一啲規模細嘅分行，都沒有購買保安設備，故此劫匪好容易得手。事實上，意大利好多打劫嘅人，都係好業餘水平，佢哋做案嘅武器，多數只係一把刀仔，好少有手槍，更加唔好講有冇AK47。