合和胡仔500萬新車買嚟擺

【明報專訊】香港周街都係名車，老外來到一睇，滿街不是平治，便是寶馬，還以為全港都是富豪，佢哋或者不知香港養車奇貴，既然都咁貴，自然唔會揸部「錢七」四處去，兼且香港富豪又確係多（這可能反映貧富不均問題嚴重），總之，香港多靚車的確係事實。小琴講咁耐，當然有弦外之音，事關香港又多咗部超級名車，呢架係德國平治，喺英國生產嘅Mercedes McLaren，單係車價都要500萬港銀，夠晒普通人喺新界買間800方呎，兼且質素不俗的二手樓。咁呢部名車花落誰家？小琴收到風，買入此車嘅正是合和實業（0054）董事總經理胡文新。講開呢部車，小琴唔單止知道胡仔為香港率先引入，仲聽聞胡仔架McLaren係黑色，勁cool，兼且車門直立揭開，大有一級賽車味道。最厲害嘅係，此車馬力勁，由零至時速100公里，只要3.7秒，喺紅綠燈起步，勢必轉眼彈出，座位貼背感肯定勁到無輪，總之實係愛車之人嘅至愛。左軚車 只可做住收藏品先之不過，小琴又聽聞呢部McLaren全球產量只得75部，而且全部只生產左軚，因此胡仔買咗呢部車返香港，暫時只能當係收藏品睇住先，唔可以揸出街。除非得閒連部車運返珠海飛番轉，抑或索性先運返內地攞大陸牌，然後再申請中港車牌，咁樣就可以喺香港慢慢揸。講開又講，胡仔都幾鍾意車，唔好以為佢只係買上述呢種超級跑車，其實胡仔都算環保，早前斥資7.9萬元，成為首位買入香港理大研發嘅My Car電動車車主，雖然此車最高速只得時速64公里，而且每次充完電只夠行110公里，不過胡仔為推動環保，一樣照買支持。報料電郵﹕piano@mingpao.com