王征指已向亞視泵水5億

【明報專訊】廣管局要求亞視喺今年底內提交未來5年嘅投資計劃，要達到政府要求嘅23.3億元。亞視嘅股權問題七國咁亂，邊個股東肯認頭咁大筆投資呢？亞視準股東、內地商人王征接受周刊訪問，佢話不斷注資入亞視，估計已向亞視泵水逾5億元。但亞視股東蔡衍明反駁，指王征冇投資咁多錢入亞視。佢又話，如果王征證明到已投資5億元入亞視，佢願意「撤」（即撤出亞視）。 王征接受《東周刊》訪問，報道話佢過去10個月不斷買入亞視嘅可換股債券（Convertible Bonds，簡稱：CB），注資入亞視出糧畀員工。5月份嘅3000萬元可換股債券，全部由王征認購，佢話「亞視透過可換股債券出糧，每次都要開董事會，又有人反對，我想畀錢都好難」。 小琴問番代表旺旺老闆蔡衍明、坐喺亞視董事局嘅黃寶慧，佢話發CB當然要開會通過，因為關乎股東利益。至於報道提到王征已注資5億元，黃小姐話王征至今只係用咗9500幾萬元買CB，另外王征用3.3億元向其他股東買亞視股權，好似仲未完成交易。 黃小姐仲話，「如果王征拿出證據證明已投入5億元到亞視，蔡老闆願意退出亞視。」