踢爆地產商「主宰」香港

【明報專訊】香港樓價持續升溫，究竟點解？相信政府、地產商都有唔同講法。曾做過新鴻基地產集團（0016）創辦人郭得勝私人助理、之後加入嘉里建設（0683）嘅潘慧嫻寫咗本書叫《地產霸權》，揭露地產商點樣壟斷香港樓宇供應，並擴展至公用、零售服務業。呢本書06年出英文版，今年就翻譯咗中文版，仲加入近年熱門嘅地產事件，小琴先睹為快，同大家分享一下。 作者話前屋宇署長梁展文，退休後獲新世界發展（0017）嘅附屬公司聘用，明顯涉及利益衝突。佢話政府官員經常要同地產商談判，官職愈高，職權愈大，愈容易被地產商唆使，建立互利關係。佢又話地產商嘅業務伙伴，包括銀行、法律、建築、工程同建造業，都喺行政長官選舉委員會嘅800個議席中，佔咗唔少議席，顯示香港議會制度，充分反映了地產界嘅利益…… 特首選舉 地產商及伙伴影響力大 究竟地產商同政府建立咩關係呢？作者就引述F.L.Ganshof嘅著作《Feudalism》（封建制度）。呢種制度係歐洲中古時期，地主分封土地畀騎士，作為騎士服務嘅報酬。地主有土地，亦都獲得政治權力，逐漸牟取私利。佢話香港都係「土地等於權力」，大企業喺物業發展賺錢後，就去收購公用企業。小市民要為住屋、生活必需品支付過高嘅價格。但政府偏偏坐視不理，「政府為虎作倀，不是主動地協助大企業，就是採取被動的不干預政策，助長財團的優勢，普通市民求助無門」。佢呢番話，相信反映唔少小市民心聲。作者幫過地產商打工，家就喺加拿大定居，聽講佢今個月會出席香港書展嘅講座，同公眾分享。 報料電郵﹕piano@mingpao.com