馬時亨「讚」長毛有進步

【明報專訊】馬時亨無官一身輕，替中策集團（0235）做非執行主席，又出席教會活動分享宗教信仰。上個周末佢就出席林以諾牧師嘅棟篤笑大型佈道會Yeah Show，除咗分享宗教，佢仲讚「長毛」梁國雄有進步。 長毛回應：「和尚過河」 話說佢2006年仲做緊財經事務及庫務局長時，記得有一次出席立法會會議，當時「長毛」梁國雄議員，攞住個示威標語「英年早逝」，向住馬局長同唐英年。馬時亨話冇嬲到梁國雄，當時只係低頭祈禱，希望上主寬恕長毛。近期佢見到長毛話司徒華係咪「癌症上腦」，馬時亨話﹕「長毛家唔咒人死，只係話人癌症上腦，已經進步咗。」馬時亨話相信上帝應許咗佢嘅禱告，令長毛有改善。 小琴噚日問番長毛，佢話當時唔係咒馬時亨「英年早逝」，而係針對唐英年。長毛又回贈馬時亨一句「和尚過河」，即係佢已經放低咗件事，點解馬時亨仲記住呢？ 爆廖秀冬左眼弱視 講番馬時亨嘅分享，佢話自己喺2008年發現患上腦血管畸形症，都係神嘅旨意。佢原本去睇病醫咳，醫生建議佢做詳細檢查，咁啱部檢查儀器被人用緊，於是醫生安排佢用一部更全面嘅儀器，照埋佢個腦，就咁意外地發現腦病。佢仲爆咗另一名前高官環境及工務局長廖秀冬嘅秘密，「佢左眼30年來剩得幾個巴仙視力，九成看不到，原來佢一直『隻眼開隻眼閉』！最近佢透過祈禱，左眼已經好番好多。」 報料電郵﹕piano@mingpao.com