港龍﹕名牌雪糕唔慳得

【明報專訊】搭過港龍嘅乘客都知道，搭佢哋嘅班機除咗飛機餐點外，仲有得嘆番杯Haagen-Dazs雪糕。大家都知道，呢一杯仔雪糕出面至少賣20蚊，航機為全機乘客提供呢款甜品都幾重皮。公關大員話，就算點慳成本，都唔慳得呢杯雪糕，因為好多乘客唔食正餐，都會食杯雪糕，可見客人對呢杯雪糕期望同評價都好高。 生日賀壽升級脆皮雪糕 港龍今年25周年生日，仲特別推出同一牌子、更貴嘅脆皮雪糕。不過，想試呢款雪糕，就要喺7月26日港龍生日，乘搭佢哋部分航班，先有機會食到。除咗呢日，由7月至今年底，港龍乘客都獲送曲奇。但顧客最關心，梗係機票有冇折扣優惠。港龍會喺7月26日凌晨起，25個鐘頭內（即係到7月27日凌晨1時），透過港龍網站訂購今年內使用嘅機票，每第25、50、75項交易者，如此類推，就會中獎。獎品係所訂購嘅同等價值現金券，可以下次訂港龍機票。 7月26日網站訂機票可抽獎 港龍又獎賞機上購物者，每消費500元，可以參加抽獎。每月會抽出一位得獎者，獲得35,000元的足金港龍飛機擺設。公關話機上購物反應好好，往北京、上海、菲律賓、韓國等航綫更為突出。有啲航綫行程短，但買嘢嘅乘客多，試過有飛機到埗後，乘客未買完心頭好，差啲唔捨得落機。