恒生鮑魚靚酒大宴豪客

【明報專訊】招呼大豪客，出手當然要闊綽，恒生銀行（0011）旗下私人銀行深明此道，連續兩晚（6月23日及24日）假恒生總行博愛堂舉行晚宴，又出鮑魚又出靚酒，共宴請超過150位私人銀行客戶，認真係豪請大豪客！聽講有客人仲係專登由深圳落嚟香港，出席呢個盛會，更有客人喺飲飽食醉之餘，撞番失散多年嘅舊朋友！ 六道菜襯六隻酒 恒生蛇宴出晒名，不過家唔係食蛇嘅季節，由國金軒過檔恒生嘅總廚陳錦成師傅，決定搞搞新意思。睇吓佢張菜單，「瑤柱竹笙燕窩羹」、「蜜餞吉品鮑魚扒花膠件」，見到個名已經流口水，最特別之處係，每一道菜都會襯番一隻白酒或者紅酒，每位客人坐底有6杯酒，就算唔添飲，每人都有半支酒落肚，恒生仲請埋專業品酒師一邊講解每種酒可以點樣品嘗，名副其實會飲飽食醉！ 同場展出名畫珍藏 今次晚宴名為「藝．賞」，原來除咗佳餚靚酒外，現場仲展出40幾件國畫、水墨畫及藝術珍藏品，有埋視覺享受。恒生助理總經理兼私人銀行及信託服務主管李佩珊（Rosita）話，成個活動由3月開始籌備，除咗試菜外，最困難嘅地方就係要配番適合嘅酒，有時就算揀啱酒，亦都要睇吓買唔買得夠。恒生今次呢個宴會，足足入咗成280支酒，而且仲要額外添置酒杯呢！ Rosita話，今次活動後始發覺原來好多客人都對藝術十分有興趣，有啲人屋企亦有大量收藏品，好多客人話可以攞私伙出嚟展覽呢！ 報料電郵﹕piano@mingpao.com